с. Руч

Ручын вocьтicны казьтылан пӧв

Июнь 22-ӧд лунӧ, Великӧй Отечественнӧй война пансян да сылӧн биа косьясын усьӧм салдатъясӧс казьтылан да шогалан лунӧ, Ручын кыпыда восьтicны казьтылан пӧв танi чужлӧм С.С. Есевлы, кодi повтӧг тышкасис вӧрӧгкӧд. Сад дорын, кодлӧн стенмӧ буретш ӧшӧдicны пӧвсӧ, чукӧрмылic уна йӧз – верстьӧ, олӧмаяс, челядь. Кыпыд лоӧмторсӧ восьтicны велӧдчысьяслӧн Россияса ӧтмунӧмӧ пырысьяс Анастасия Попова да Диана Расова война йылысь кывбуръяс лыддьӧмӧн. Библиотекаса уджалысь Надежда Александровна Метлякова висьтыштic Степан Степанович Есев йылысь.

Ручса зонмӧс 1939 воын босьтicны армияӧ, кӧнi велӧдчис связистӧ. Служитic 28-ӧд стрелкӧвӧй дивизияын, кодi бӧрынджык лоис Невельсаӧн. Война пансьӧм бӧрын дивизия тышкасис Киев дорын. Вӧрӧглӧн кытшысь петicны лыдаӧн, на лыдын и связьлӧн отделениеса командир Степан Есев. Салдатъяс петкӧдicны дивизиялысь знамясӧ. Выль дивизия сэсся дорйис Великие Луки кар. Быд тышын коми морт петкӧдлic повтӧмлун, бырӧдic 100-ысь унджык фашистӧс. Дивизияса медбур салдатъясӧс пасйисны Монголияса боевӧй медальясӧн, тшӧтш и снайпер Есевӧс. 1943 вося январын сержант Есевлы вичмӧдicны Гӧрд Знамя орден. Победа сiйӧс суис Германияын. Гвардияса лейтенант Есев гортас бергӧдчис 1946 воын. Морӧс вылас югъялicны, водзынджык сетӧмъясысь кындзи, Гӧрд Звезда орден, «За отвагу» да «За победу над Германией» медальяс. Степан кындзи война вылӧ мунлicны кыкнан вокыс, но найӧ гортаныс эз бергӧдчыны: Иван вошис юӧртӧг, а Илья усис ылi муын. Степан Степанович семьянас олic Сыктывкарын, уджалiс Сыктывкарса вӧр вӧчан комбинатын да мукӧд котыръясын. Кувсис 1975 вося январ 12 лунӧ. Тавося июнь 26 лунӧ сылы эськӧ тырис 100 арӧc.

Сьӧлӧм вӧрзьӧдан кывъяс висьталicны сиктса юралысь Д.В. Кирушев да олӧмаяслӧн районса котырӧн веськӧдлысь Г.А. Кравченко. Галина Арсеньевна пасйис:

— Тiян сиктса мортлы, фронтӧвиклы, С.С. Есевлы, казьтылан пӧв восьтӧм – ыджыд тӧдчанатор. Тайӧ колӧ ловъяяслы, челядьлы, внукъяслы, правнукъяслы, медым тӧдicны Великӧй Отечественнӧй войнаын Победа шедӧдӧм, миян салдатъясӧн ыджыд вермӧм йылысь. Ыджыд аттьӧ 28-ӧд Невельса Гӧрд Знамя ордена стрелкӧвӧй дивизияысь ветеранъяслӧн сӧветӧ пырысь Сергей Викторович Таскаевлы, кодлӧн водзмӧстчӧмӧн вӧчисны да ӧшӧдicны Степан Есевлы сиӧм пас. Сылӧн жӧ отсӧгӧн Габовын кыпалic Георгий Победоносецлӧн часовня, кӧнi сiдзжӧ казьтылӧны война вылын вӧвлӧмъясӧс. Ветеранъяслӧн отсӧгӧн сиктъясын да шойнаяс вылын сувтӧдicны фронтӧвикъяслӧн нимъяса казьтылан пасъяс. Оз ков вунӧдны найӧc, кодъяс тышкасисны миян шуда олӧм вӧсна.

Олӧмаяслӧн котырӧн веськӧдлысь А.И. Адамова сiдзжӧ пӧся аттьӧалic С.В. Таскаевӧс корсьысьӧмысь да сиктса фронтӧвиклы казьтылан пӧв вӧчны отсалӧмысь. Сылы, дерт, зэв нимкодь, ӧд Степан Есев сылӧн матысса рӧдвуж — батьыслӧн воча вок, и мойвиис тӧдмавны сы йылысь унджык. Аттьӧалic и С.С. Есевлысь Сыктывкарысь воӧм рӧдвужcӧ – Анастасия Степановна чойыслысь Валерий Николаевич Напалков писӧ, кодi водзтi уджавлic Кулӧмдiнса леспромхозын главнӧй инженерӧн да лесопунктса начальникӧн, Зоя Степановна чойыслысь нывcӧ, Ангелина Андреевна Мальцеваӧс, да сылысь Михаил Семёнович Конаков верӧссӧ.

— Степан Степанович Есевлӧн пыдди пуктана рӧдвуж, Ручса олысьяс, тiянлы колӧ нимкодясьны, мый сиктаныд чужиc татшӧм морт, повтӧм салдат, бура лыйсьысь, кодi бырӧдiс 100-ысь унджык немечӧc. Сiйӧ, кыдз мукӧд салдатъяс, тышкасис миян Айму вӧсна. И талун, сир курыд война казьтылан да шогалан лунӧ, копыртлам юрнымӧс став водзын, кодъяс асьнысӧ жалиттӧг бырӧдicны немечӧc, — сёрнитic С.В. Таскаев.

Пӧв восьтiгӧн гӧрд лента вундicны Д.В. Кирушев, С.В. Таскаев да А.И. Адамова. Казьтылан пӧв дорӧ пуктicны дзоридзьяс.

Сэсся ставӧн чукӧртчылicны война вылын усьӧмъяслы пас дорын. Танi биа косьяса война йылысь казьтывлӧмӧн юргисны кывбуръяс, а «Сударушки» котырсаяс сьылicны. Усьӧм салдатъясӧс чӧв-лӧньӧн казьтыштӧм бӧрын пас дорӧ пуктicны дзоридзьяс.

Ставӧн ветлicны и шойнавывcа пас дорӧ, кӧнi казьтыштicны фронтӧвикъясӧс, кодъяс война бӧрын бергӧдчисны гортӧ да кувсисны танi. Налы сиӧмӧн челядь лыддисны кывбуръяс, Г.А. Кравченко висьталic сьӧлӧмӧ йиджан кывъяс. Сэсся «Журавлиный клин» ӧтув сьылӧм улӧ пас дорӧ пуктicны дзоридзьяс.

Галина НЕСТЕРОВА.

Гижысьлӧн снимок вылын: казьтылан пӧв.

 

Парма гор, 2018, Июнь 28 лун.

 © Усть-Куломская межпоселенческая библиотека